Universitetimizda AQShlik mutaxassis ingliz tili fanidan o'quv mashg'ulotlarini olib boradi.

AQSh elchixonasi huzuridagi Mintaqaviy ingliz tili bo'limi (RELO) vakillari bilan uchrashuv bo‘lib o‘tdi. Rasmiy uchrashuv davomida AQSh elchixonasi bilan amalga oshirilgan loyihalarga to'xtab o'tildi va kelgusidagi rejalar muhokama qilindi.

2025–2026 o‘quv yilida universitetimizda "English Language Fellow" dasturi doirasida faoliyat olib boruvchi Kinsey Norton xonim rahbariyat, xorijiy filologiya fakulteti jamoasi va talabalarga tanishtirildi, davra suhbati o'tkazildi. Kinsey Norton shu vaqtga qadar AQSh, Litva, Rossiya va Qirg'iziston ta'lim dargohlarida ingliz tili bo'yicha o'quv mashg'ulotlarini olib borgan. 

"Universitetingiz talabalari bilan ularning ingliz tili, ayniqsa, gapirish va yozish ko'nikmalari ustida ishlashni niyat qilganman. O'ylaymanki, fakultet jamoasi ham meni yaxshi qabul qiladi, yuqori natijalarni birgalikda qayd etamiz. Shuningdek, talabalarni o'zim tashkil etadigan "Speaking Club" ga taklif etaman", - deya ta'kidladi Kinsey Norton.

Ma'lumot o'rnida, elchixona tomonidan yuborilgan ETA dasturi bo'yicha AQShlik mutaxassis Christopher Cowan 2021-2022 o'quv yilida universitetimizda faoliyat olib borgan edi.