Termiz davlat universiteti O‘zbek filologiyasi fakultetida iste’dodli shoir, publitsist, tarjimon va mufassir Mirzo Kenjabek tavalludining 70 yilligi munosabati bilan “Vatan, qalblardasen, qarog‘lardasen!” nomli adabiy-badiiy kecha bo‘lib o‘tdi.
Mazkur tadbir nafaqat ijodiy uchrashuv, balki ma’naviy xotira va ehtirom oqshomi sifatida yuksak ruhda tashkil etildi. Unda adibning hayot yo‘li, serqirra ijodi, milliy tafakkur va ma’rifatni targ‘ib etishdagi o‘rni haqida atroflicha so‘z yuritildi. Shoir qalamiga mansub she’rlardan namunalar talaba-yoshlar tomonidan ifodali tarzda o‘qilib, yig‘ilganlarga chuqur taassurot qoldirdi.
Ayniqsa, buyuk muhaddis Abu Iso Muhammad Termiziy siymosiga bag‘ishlangan “Ona rizosi” she’rining sahnalashtirilishi kechaning eng ta’sirli onlaridan bo‘ldi. Ushbu sahna ko‘rinishi orqali nafaqat tarixiy shaxsga ehtirom, balki onaga bo‘lgan cheksiz hurmat va sadoqat g‘oyasi teran badiiy talqin etildi.
Adabiy-badiiy kecha milliy qadriyatlarimiz, Vatanga muhabbat, ma’naviy poklik va ma’rifatparvarlik ruhini yana bir bor qalblarda jo‘sh urdirdi.
TerDUda bunday ma’rifiy tadbirlar yoshlar qalbida so‘zga, she’riyatga va milliy merosimizga bo‘lgan muhabbatni yanada mustahkamlaydi.
