Termiz davlat universitetida sun’iy intellekt texnologiyalarini joriy etish ishlari taqdimot qilindi

Prezidentimiz tashabbusi bilan mamlakatimizda hududlar va tarmoqlarda sun’iy intellekt texnologiyalarini joriy etish bo‘yicha keng ko‘lamli islohotlar amalga oshirilmoqda. Xususan, Surxondaryo viloyatida ham ilmiy-tadqiqot va amaliy yo‘nalishlarda qator loyihalarga start berilgan.

Bugun viloyat hokimi Ulug‘bek Qosimov Termiz davlat universiteti Registrator ofisida sun’iy intellekt asosida yaratilgan axborot tizimlari va raqamli xizmatlar taqdimoti bilan tanishdi.

Ayni paytda oliygohda 110 ta xizmat turi onlayn ko‘rsatilmoqda, shulardan 60 tasi mobil ilovalar orqali foydalanish imkoniyatiga ega. Endilikda mazkur imkoniyatlar sun’iy intellekt texnologiyalari yordamida yanada takomillashtirilmoqda.

Viloyat rahbari dasturchilar salohiyatini qo‘llab-quvvatlash, ular orqali hududning ijtimoiy-iqtisodiy rivojlanishiga hissa qo‘shish, shuningdek, turli tarmoq va sohalarga sun’iy intellekt yechimlarini keng tatbiq etish zarurligini ta’kidladi.

Shuningdek, universitetda ta’lim sifatini oshirish, talabalarning ilmiy salohiyatini yuksaltirish hamda oliygohning milliy va xalqaro reytingdagi o‘rnini mustahkamlashga qaratilgan ishlar va amalga oshirilayotgan loyihalar bilan ham tanishildi.