TerDU o‘qituvchilari ichki turizmni rivojlantirishga hissa qo‘shmoqda

O‘zbekiston Respublikasi Prezidenti Shavkat Mirziyoyev raisligida 2025-yil 9-aprel kuni o‘tkazilgan videoselektor yig‘ilishida har oyning bir shanbasi yoki yakshanbasi “Oila va mehnat jamoasi bilan sayohatga chiqish kuni” sifatida belgilanishi e’lon qilindi.

Mazkur ezgu tashabbusni Termiz davlat universiteti professor-o‘qituvchilari faol qo‘llab-quvvatlab, shanba kuni Sherobod tumanidagi Imom Abu Iso At-Termiziy hamda Termiz shahridagi Al-Hakim At-Termiziy maqbaralariga tashrif buyurishdi.

Ushbu tashrif ichki turizmni rivojlantirish, tarixiy obidalar bilan yaqindan tanishish, shuningdek, milliy o‘zlikni anglash va yosh avlod qalbida vatanparvarlik tuyg‘usini mustahkamlashga xizmat qilmoqda.

Sayohat davomida ishtirokchilar muqaddas ziyoratgohlarning tarixiy ahamiyati bilan tanishib, ajdodlarimizning boy merosini chuqur his etdilar. Bunday tashriflar mehnat jamoasida sog‘lom muhitni shakllantirish, jamoaviylik va hamjihatlikni kuchaytirishda muhim ahamiyat kasb etadi.

Termiz davlat universiteti jamoasi bundan keyin ham ushbu tashabbus doirasida turli madaniy-ma’rifiy yo‘nalishlardagi sayohatlarni davom ettirishni rejalashtirmoqda.