Prezidentimizning Surxondaryo viloyatini ijtimoiy-iqtisodiy rivojlantirish hamda infratuzilmasini yanada yaxshilashga oid qarorida Xo‘jamayxona darasida zamonaviy turizm maskanini tashkil etish bo‘yicha master-reja ishlab chiqish belgilangan.
Shu maqsadda, viloyat hokimi Ulug‘bek Qosimov Boysun tumanida o‘tkazgan sayyor qabuldan so‘ng Termiz davlat universitetining "Darband" o‘quv-amaliyot bazasi bilan tanishdi. U yerda universitet rektori tomonidan mavjud imkoniyatlar, ulardan samarali foydalangan holda amalga oshiriladigan loyihalar taqdimot qilindi.
Shuningdek, Xo‘jamayxona darasi bo‘ylab yurilib, zamonaviy turizm markazini tashkil etishga qaratilgan master-reja loyihalari bilan joyida tanishildi. Mazkur rejani takomillashtirish, unga zip-layn, kapsulali uylar, "hiking", "hard trekking", 5 kilometrli velo va piyoda yo‘laklari hamda boshqa zamonaviy turizm infratuzilma elementlarini kiritish vazifalari belgilandi.
Ushbu tashabbuslar Xo‘jamayxona darasida ekoturizmni rivojlantirish, 1-2 kunlik tabiat qo‘ynidagi sayrlar hamda 3 kun va undan ziyod davom etadigan ekstremal sayyohlik turlari uchun qulay sharoitlar yaratishga xizmat qiladi.
