Uzun tumanida ham TerDUning targ‘ibot tadbirlari bo‘lib o‘tdi

Bugun Termiz davlat universiteti Milliy libos va san’at fakulteti tashabbusi bilan Uzun tumanidagi bitiruvchi sinf o‘quvchilari ishtirokida Ochiq eshiklar kuni targ‘ibot tadbiri hamda Mehnat yarmarkasi tashkil etildi.

Tadbir davomida Termiz davlat universitetida mavjud bakalavriat ta’lim yo‘nalishlari va magistratura mutaxassisliklari bo‘yicha batafsil ma’lumotlar berildi. Muloqotlar chog‘ida universitet kampusida yaratilgan shart-sharoitlar, o‘quv-moddiy texnik baza, ilmiy va amaliy imkoniyatlar, shuningdek, universitetning moliyaviy va akademik mustaqil maqomi haqida so‘z yuritildi.

Ishtirokchilarga, shuningdek, universitetning xalqaro oliy ta’lim muassasalari bilan hamkorlikdagi qo‘shma ta’lim dasturlari tanishtirildi. Tadbir davomida o‘quvchilar o‘zlarini qiziqtirgan savollarga atroflicha javob olishdi.

Yakunda, tadbirni tashkil etishda yaqindan hamkorlik qilgan Uzun tumanidagi mas’ul tashkilotlar vakillariga Termiz davlat universiteti rektorining tashakkurnomalari topshirildi.