Darbandda yangi turizm va yashil energetika sari dadil qadam!

TerDU huzuridagi Darband o‘quv-amaliyot bazasida viloyat hokimi U.Qosimov ishtirokida o‘tkazilgan uchrashuvda Termiz davlat universiteti rektori tomonidan hududning tabiiy imkoniyatidan unumli foydalanish, sayyohlik oqimini oshirish va barqaror iqtisodiy o‘sishga xizmat qiladigan bir qator loyihalar taqdim etildi.

Davlatimiz rahbarining xorijiy va mahalliy turistlar oqimini ko‘paytirish, mavjud sayyohlik yo‘nalishlari bo‘ylab zamonaviy xizmatlar ko‘rsatishni tashkil etish bo‘yicha bergan topshiriqlariga asosan viloyat hokimining ko‘rsatmasi bilan Darband darasi bo‘ylab zamonaviy turistik xizmatlar tashkil etiladigan bo‘ldi.

Taqdimotda bazada qurilayotgan mini-GES orqali nafaqat mazkur direksiyaning elektr energiyasiga bo‘lgan ehtiyoji ta’minlanishi, balki hududiy elektr tarmoqlariga ham energiya yetkazib berish imkoni yaratilayotganligi keltirib o‘tildi. Bu esa yashil energetika va barqaror rivojlanishga xizmat qiluvchi muhim omildir.

Viloyat rahbari bilan bo‘lgan samimiy muloqot turizmning noyob va daromadli yo‘nalishlarini hayotga qisqa fursatlarda tatbiq etilishida katta ahamiyat kasb etdi.

U.Qosimov tashabbuslarni qo‘llab-quvvatlash, katta salohiyatdan unumli foydalanish yuzasidan mas’ullarga aniq topshiriqlar berdi.