“Xotin-qizlarni tazyiq va zo‘ravonlikdan himoya qilish”

Xorijiy filologiya fakulteti talaba-qizlari ishtirokida “Qizlarimiz huquqi – kafolatimiz” hamda “Xotin-qizlarni tazyiq va zo‘ravonlikdan himoya qilish” mavzularida uchrashuv tashkil etildi.

Tadbir davomida talaba-qizlarning huquqiy savodxonligini oshirish, ularni turli salbiy illatlardan asrash, oilaviy totuvlikni mustahkamlash hamda yoshlarni qo‘llab-quvvatlash masalalari yuzasidan atroflicha fikr almashildi.

Uchrashuvda Termiz shahar IIB masʼul xodimlari hamda Termiz davlat universiteti profilaktika inspektorlari ishtirok etib, yoshlarga huquqiy maslahatlar berishdi.

Tadbir davomida zo‘ravonlikka uchragan ayollar taqdiri, ajrim oqibatida farzandlar hayotida yuzaga keladigan muammolar aks etgan qisqa metrajli videofilmlar namoyish qilindi. Videofilmlar talaba-qizlarda chuqur taassurot qoldirib, ularda hayotiy saboq olish va ibratli xulosalar chiqarish imkonini berdi.

Bunday uchrashuvlar talaba-qizlarning huquqiy ongi va dunyoqarashini yuksaltirishga xizmat qiladi.