8-mart – Xalqaro xotin-qizlar kuni munosabati bilan TerDU ayollariga ehtirom ko‘rsatildi

Shahrimizdagi Muhtasham tantanalar saroyida tashkil etilgan bayram tadbiriga universitetimizning olima professor-o‘qituvchilari hamda ishchi-xodimlari taklif etildi.

Tadbir avvalida rektorimiz barcha munis va mo‘tabar ayollarni samimiy muborakbod etib, ularning universitet nufuzini oshirishdagi fidokorona mehnatini alohida e’tirof etdi. Shuningdek, ayollarga ko‘rsatiladigan ehtirom jamiyat ravnaqi, baxtli oilalar va munosib avlod tarbiyasi uchun muhim omil ekanini ta’kidladi.

Bayramning badiiy dasturi ham yig‘ilganlarga ko‘tarinki kayfiyat ulashdi. Vohamizning el suygan san’atkorlari hamda poytaxtdan tashrif buyurgan zamonaviy estrada xonandasi Mashhurbek Raimjonovning chiqishlari barchani raqslarga chorladi.

Bayram dasturi nafaqat ayollarimizga, balki barcha ishtirokchilarga charchoqlarni chiqarish, kayfiyatni ko‘tarish, ijobiy quvvat olish imkonini berdi. Taomilga ko‘ra, tadbir yakunida bir martalik moddiy rag‘batlantirilgan ayollarimiz sovg‘a-salomlar bilan uylariga kuzatildi.

Barcha ayollarimizni yana bir bor bayram bilan muborakbod etamiz!