Ilm maydonida Afg‘on shamoli ta’siriga qarshi kurash!

Termiz davlat universiteti olimlari, yosh tadqiqotchilari va talabalari Afg‘on shamolining salbiy ta’sirini kamaytirish bo‘yicha ilmiy izlanishlarni izchil davom ettirmoqda.

Ayni kunlarda Termiz davlat universitetiga qarashli Termiz tumanidagi dala tajriba hududida “Afg‘on shamoli dinamikasini o‘rganish dala tadqiqot maydonchasi” tashkil etilmoqda. Ushbu hududda ilmiy tadqiqot olib borayotgan talabalar shamolning yo‘nalishi, tezligi, chang konsentratsiyasi hamda uning tuproq va o‘simliklarga ta’sirini kuzatish va tahlil qilish ishlarida faol ishtirok etmoqda.

Mazkur tashabbus Afg‘on shamolining ekologiya, qishloq xo‘jaligi va aholi salomatligiga ta’sirini chuqur o‘rganish, uning salbiy oqibatlarini kamaytirish bo‘yicha ilmiy asoslangan tavsiyalar ishlab chiqish hamda hududda ekologik barqarorlikni ta’minlashga xizmat qiladi.